தேவாங்கர்கள் தமிழ்நாட்டிற்கு வந்த காலம்:
தமிழ்நாட்டில் கிடைத்துள்ள சில கல்வெட்டுச் சான்றுகளையும், பிறவற்றையும் கொண்டு அக்காலத்தை ஒரளவு உணரமுடிகிறது.
மதுரை மீனாட்சியம்மன் கோவிலின் கீழ்க்கோபுரச் சுவரில் கி.பி 1579 ஆம் ஆண்டுக் கல்வெட்டில், இராமநாதபுர மாவட்டத்தை சேர்ந்த தேவாங்கர்கள் மீது விதிக்கப்பட்டிருந்த வரி தள்ளுபடி செய்யப்பட்ட செய்தி காணப்படுகிறது.
தஞ்சை மாவட்டம் கபிஸ்தலம் என்னும் ஊரில் தேவாங்கர் மடம் ஒன்று இருந்தது, அதில் விஜயநகர அரசன் அச்சுத தேவராயன் ஆட்சியில் கி.பி 1542 ஆம் ஆண்டு சாரங்கதேவன் என்னும் பக்தன் தேவாங்கர்களுக்கு சன்மானம் வழங்கிய செய்தி உள்ளது.
சேலம் தேவாங்கர்கள்:-
இந்திய நாட்டில் தேவாங்கர்கள் நேபாளம் முதல் கன்னியாகுமரி வரை பரவியிருக்கிறார்கள், கடல் கடந்த நாடுகளிலும் வாழ்கிறார்கள். தமிழ்நாட்டில் தேவாங்கர்கள் எப்போது குடியேறினார்கள் என்பது திட்டவட்டமாக தெரியவில்லை. ஆயினும், தமிழ்நாட்டில் தேவாங்ககுல சோணாசல மடாதிபதிகள் குருவம்ச பரம்பரையில் முதல் குருவான இராமலிங்க சுவாமிகள் இன்றைக்கு 1150 ஆண்டுகளுக்கு முன் பட்டத்திற்கு வந்தவர் ஆகவே இதிலிருந்து ஆயிரக்கணக்கான ஆண்டுகளுக்கு முன்பே தமிழ்நாட்டில் தேவாங்கர்கள் குடியேறிவிட்டார்கள் என்பதை உறுதி செய்யலாம்.
சேலம் ஜில்லாவைச் சேர்ந்த தேவாங்கர்கள், தாங்கள் விஜயநகர சாம்ராஜ்ஜியத்தின் தலைநகரமான "ஹம்பி"யில் வாழ்ந்தவர்கள் என்றும், அங்கிருந்து தமிழ்நாட்டிற்கு வந்து சேலம் ஜில்லாவில் தாரமங்கலத்தை அடுத்துள்ள கெட்டிமுதலி வம்சத்தாரின் தலைநகரமான "அமரகுந்தி" என்னும் ஊரே தங்கள் முதல் குடியிருப்பு பகுதி என்று கூறுவதாக "சென்னை கெஜட்-1967 ம்ஆண்டு-சேலம் ஜில்லா-பக்கம் 131-132" ய் திரு A.இராமசாமி என்பவர் குறிப்பிட்டுள்ளார்.
