ராமலிங்க சவுடேஸ்வரி அம்மன் கோவில் கும்பாபிஷேகம்

நன்றி : dailythanthi.com/News/Districts/Salem/2015/02/11230611/Amman-cavutesvari-The-temple-was-consecrated-Weerakumar.vpf

நங்கவள்ளி ராமலிங்க சவுடேஸ்வரி அம்மன் கோவில் கும்பாபிஷேகம் புதன், பெப்ரவரி 11,2015 நடைபெற்றது. இந்த கோவில் திருவிழாவையொட்டி, வீரகுமாரர்கள் கத்திபோடும் நிகழ்ச்சியும் நடந்தது.

கோவில் கும்பாபிஷேகம் : 

நங்கவள்ளியில் பிரசித்தி பெற்ற, தேவாங்க குல ராமலிங்க சவுடேஸ்வரி அம்மன் கோவில் உள்ளது. இக்கோவில் கருவறை முழுவதும் கருங்கல்லால் கட்டப்பட்டு, இதில் நான்கு புறமும் சிற்ப நுணுக்கத்துடன் கருங்கல் பத்மங்களுக்கு இடையே உருண்டோடும் கருங்கல் உருளைகள் அமைக்கப்பட்டுள்ளது. இந்த அமைப்பு வேறு எந்த சவுடேஸ்வரி அம்மன் கோவிலிலும் இல்லாத தனிச்சிறப்பாகும். இந்த கோவில் கும்பாபிஷேக விழா கடந்த 23-ந் தேதி கொடியேற்றத்துடன் தொடங்கியது.

நேற்று முன்தினம் அதிகாலை விக்னேஸ்வர பூஜையுடன் கும்பாபிஷேக வழிபாடுகள் தொடங்கின. இதையொட்டி வாஸ்து பூஜை, வாஸ்து ஹோமம் உள்ளிட்ட பல்வேறு சிறப்பு வழிபாடுகள், பூஜைகள் நடந்தன. பின்னர் காலை 10 மணிக்கு பெரியோர்கள் அழைப்பும், லட்சுமி நரசிம்ம சுவாமி கோவிலில் இருந்து மகா கும்பாபிஷேகம் மற்றும் திருவிழா கமிட்டிதலைவர் அழகரசன் தலைமையில் முக்கிய பிரமுகர்கள் முன்னிலையில் யானை, குதிரை, பசு ஆகியவற்றுடன் தீர்த்தகுட ஊர்வலம் நடைபெற்றது. அன்று மாலை, முதல் காலயாக பூஜையும், இரவு இன்னிசை நிகழ்ச்சியும் நடைபெற்றது.

இதைத்தொடர்ந்து விழாவின் முக்கிய நிகழ்வாக கும்பாபிஷேகம் நேற்று நடந்தது. அதிகாலை 5.30 மணி முதல் 6.30 மணிக்குள் தேவாங்க குல ஜகத்குரு தயானந்தபுரி சுவாமிகள் மற்றும் கணபதி கண்ணன் சாஸ்திரிகள் ஆகியோர் கோபுர கலசத்திற்கு புனிதநீர் ஊற்றினர். ராமலிங்க சவுடேஸ்வரி அம்மன் கோவிலுக்கும், பரிவார தேவதைகளுக்கும் மகா கும்பாபிஷேகம் நடைபெற்றது. கும்பாபிஷேகத்தையொட்டி, சுவாமிக்கு மகாஅபிஷேகம¢, சர்வ அலங்கார பூஜை நடைபெற்றது. விழா முடிவில் அன்னதானம் நடைபெற்றது.

கத்தி போடும் நிகழ்ச்சி : 

பின்னர் சவுடேஸ்வரி அம்மன் திருவிழா காலை 10 மணிக்கு சக்தி அழைத்தலுடன் தொடங்கியது. இதை தொடர்ந்து வீரகுமாரர்கள் கத்திபோடும் நிகழ்ச்சி நடைபெற்றது. நங்கவள்ளி பஸ் நிலையம் அருகில் இருந்து நகரின் முக்கிய வீதிகள் வழியாக கோவிலுக்கு வீரகுமார்கள் கத்தி போட்டபடியே, செண்டை மேள தாளத்துடன் ஊர்வலமாக வந்தனர். மாலையில் திருவிளக்கு பூஜை நடைபெற்றது. இரவு திரைப்பட நடிகர் பாக்யராஜ் பங்கேற்ற பட்டிமன்றம் நடந்தது.

இன்று (வியாழக்கிழமை) காலையில் வீரகுமாரர்கள், வீரமுஷ்டி அலகு சேவைகளுடன் நாதஸ்வரம், தாரை, செண்டை மேளம் முழங்க சாமுண்டி அழைப்பு நடைபெறுகிறது. வீரகுமாரர்கள், வீரமுஷ்டி அலகு சேவைகளுடன் மகாஜோதி அழைப்பும் நடைபெறுகிறது. விழாவின் நிறைவாக நாளை (வெள்ளிக்கிழமை) மஞ்சள் நீராட்டம் நடை பெறுகிறது.

ஏற்பாடு :

விழாவிற்கான ஏற்பாடுகளை ராமலிங்க சவுடேஸ்வரி அம்மன் கோவில் கும்பாபிஷேக விழா மற்றும் திருவிழா கமிட்டி தலைவர் அழகரசன், செயலாளர் கோவிந்த ராஜீ செட்டியார், பொருளாளர் பொம்மண்ண செட்டியார், இணைச்செயலாளர் வெங்கட்ட ராஜீ, துணைத்தலைவர்கள் மாதையசெட்டியார், ஓபுளிதேவன், நமச்சீ சித்துராஜீ, காளீஸ்வரன் மற்றும் உதவிச்செயலாளர்கள், நிர்வாகக்கமிட்டி உறுப்பினர்கள், விழாக் குழுவினர், வீரகுமாரர்கள் மற்றும் ஊர் பொதுமக்கள் செய்திருந்தனர்.