கோவை: அருள்மிகு ராமலிங்க சவுடேஸ்வரி அம்மன் கோவில் கும்பாபிஷேகத்தை
நன்றி : tamil.eenaduindia.com/State/Coimbatore/2016/06/10210649/coimbatore-sowdamman-sword-festival-news.vpf
10-Jun-2016
கோவை: அருள்மிகு ராமலிங்க சவுடேஸ்வரி அம்மன் கோவில் கும்பாபிஷேகத்தை முன்னிட்டு நடைபெற்ற கத்திபோடும் விழாவில் ஆயிரக்கணக்கான பக்தர்கள் பங்கேற்று உடலில் கத்திபோட்டு ரத்தம் சொட்ட சொட்ட கோவை சாலைகளில் ஊர்வலமாக சென்று நேர்த்திகடன் செலுத்தினர்.
கோவை ராஜவீதி பகுதியிலுள்ள அருள்மிகு ராமலிங்க சவுடேஸ்வரி அம்மன் திருக்கோவிலில் 12ஆண்டுகளுக்கு ஒரு முறை கும்பாபிஷேக விழா வெகு விமர்சையாக நடைப்பெறுவது வழக்கம்.
இந்த நிலையில் 2003ம் ஆண்டுக்கு பிறகு கடந்த 8ம் தேதி மகாகும்பாபிஷேக பெருவிழா நடத்தப்பட்டது.
இதனை முன்னிட்டு தேவாங்கசெட்டியார் எனும் சமுதாயத்தை சேர்ந்தவர்கள் உடலில் கத்திபோட்டு நேர்த்திக்கடன் செலுத்தினர். முன்னதாக சாய்பாபா காலனியை அடுத்த நெசவாளர்காலனி பகுதியிலுள்ள அருள்மிகு சவுடாம்பிகை அம்மன் திருக்கோவிலிருந்து கணபதி வழிபாடு நடத்தி, ஆயிரக்கணக்கான
பக்தர்கள் வேஸ்கோ தீஸ்கோ முழக்கத்துடன் அழகேசன்சாலை, மேட்டுப்பாளையம்சாலை, பூமார்க்கெட் மற்றும் ஒப்பணக்காரவீதி
வழியாக ஊர்வலமாக வந்தனர்.
அப்போது முழக்கமிட்டபடியே கைகளில் கூரான கத்திகளை கொண்டு உடலை கீரி ரத்தம் சொட்ட சொட்ட சுமார் 6 கிலோ மீட்டர் தூரம் நடந்து சவுடாம்பிகை அம்மனை தரிசித்து தங்களது நேர்த்திக்கடனை செலுத்தினர்.
கத்திபோடும் நிகழ்ச்சியை முன்னிட்டு கோவை மாநகரில் சுமார் 3 மணி நேரத்திற்கு போக்குவரத்து மாற்றம் செய்யப்பட்டிருந்தது.
